Hanapi Guru Tari Jaipong di Karawang


 Hanapi warga Kampung Gokgik Desa Lemahmulya Kecamatan Majalaya Kabupaten Karawang geus 28 taun tumetep tur jadi guru tari jaipong di ieu ‘kampung seniman”. Jarang nu nyaho yen inyana lain asli urang dieu. Loba nu nyangka  inyana urang Sunda, padahal urang Jawa nu micinta tur neuleuman seni Sunda, hususna seni jaipong jeung topeng banjet.
Seler Jawa nu ahli seni ketoprak teh nincak sawawa milu jeung mamangna di asrama Brimob Jakarta. Di Jakarta inyana lalajo pintonan ketuk tilu nu kadieunakeun robah jadi seni kiliningan jaipong ti Karawang. Kataji hayang neuleuman ieu seni, taun 1976 Hanapi miang ka Bandung diajar rupa-rupa tari Sunda.

Taun 1981,  mulang ti Bandung Hanapi ngagabung ka Sanggar Tari Jaipong Dewi Rengganis di Jakarta, jadi guru tari. Taun 1982 pindah ka Bekasi, jadi guru tari di Sanggar Tari  Jaipong Tumaritis.
 Taun 1984 pindah ka Karawang  jadi guru tari di Perguruan Seni Sunda Puspita Ligar pingpinan Ma Ileung (guru sinden) jeung Bah Ending (guru nayaga) nepi ka aranjeunna tilar dunya taun 1995.
Para seniman jaipong nu kawentar, diantarana, H. Suwanda (juru kendang) jeung Hj. Ijah Hadijah (juru sinden) nu dipake mangtaun-taun ku Jugala Grup Bandung, diajar di Puspita Ligar. Para seniman topeng oge, diantarana, Ali Saban, Askin jeung Bi Ijem, diajar di Puspita Ligar.
Awalna Puspita Ligar (nu ngadeg memeh taun 1976)  ngan ngajarkeun nyinden, nopeng  (maen topeng) jeung nabeuh gamelan. Saprak Hanapi pindah ka Karawang, ditambahan ku ngajarkeun tari jaipong.
Taun 1985 Hanapi ngajodo jeung sinden Karawang, Wastirah, warga Kampung Gokgik Desa Lemahmulya (harita kaasup ka Kec. Klari), boga anak dua, Lia jeung Yanti. Kersaning Nu Maha Kawasa, Wastirah tilar dunya mangsa si bungsu, Yanti, leutik keneh. Ayeuna si bungsu sakola di SDN Lemahmulya II Kelas 6.
Salila jadi guru tari,  Hanapi kungsi jadi juara tari jaipong katagori pelatih, ngawakilan sanggar tarina, diantarana: taun 1982 di Taman Impian Jaya Ancol Jakarta, ngawakilan Sanggar Tari Dewi Rengganis, taun 1984 di Taman Mini Indonesia Indah Jakarta ngawakilan Sanggar Tari Tumaritis, taun 1987 di Komplek DPRD Karawang, ngawakilan Perguruan Seni Sunda Puspita Ligar.
Saprak Puspita Ligar bubar Hanapi ngadegkeun Sanggar Tari Tumaritis Karawang. Mangsa beurang inyana jadi guru tari.  Hanapi oge  milu nopeng di grup Topeng Banjet Daya Asmara pingpinan Ali Saban, jadi “panjak” (pamaen topeng). Ali Saban Tilar dunya, ngadeg Daya Sari pingpinan Askin (mantan panjak Daya Asmara) jeung Dewi Asmara pingpinan Bi Ijem (adi Ali Saban). Mangsa peuting Hanapi milu maen di ieu dua grup.
Kiwari Hanapi tara  nopeng. Para tokoh topeng nu kungsi diiluanana geus taya di kieuna. Sanggar tarina “bangkrut” saprak istrina, Wastirah tilar dunya. Katambah, kursus-kursus tari jaipong modern ngaradeg, ngelehkeun tempat “kursusna”.
Tapi, Hanapi tetep sumanget merjuangkeun seni  jaipong tur ngeureuyeuh ngalatih tari jaipong, seni budaya Karawang nu kiwari, ceuk buku, ceuk majalah, ceuk koran, ceuk internet milik Bandung.
Hanapi ngalatih tari jaipong di imahna nu kacida waluratna di Kampung Gokgik Desa Lemahmulya, di imah bilik nu lantena taneuh, nu oge tempat nganjrekna jeung dua anakna, Lia jeung Yanti. Nu diajarna, mun bareto mah lolobana calon sinden (penari jaipong), ayeuna mah lolobana barudak sakola. Ramena teh mangsa tereh acara kenaikan kelas jeung perpisahan kelas ahir.
Harepanana, boga tempat latihan jaipong nu layak, mun bisa mah nu modern cara batur. Ari elmu jaiponganana mah geus nyampak, inyana bisa ngareka tari jaipong asli nu mimiti medal di Karawang “dimodernkeun.” (Sunta Atmaja, Giwangkara No. 2892 Jan 2012)

Jumat, 10 Februari 2012 6 komentar

6 komentar to "Hanapi Guru Tari Jaipong di Karawang"

Posting Komentar